რამდენად უსაფრთხოა ელექტრო სიგარეტი?

არის თუ არა ელექტრო სიგარეტი (ვეიფინგი) მავნე?

არსებული კვლევებით ლეგალური ელექტროსიგარეტები გაცილებით ნაკლებად მავნეა, ვიდრე სიგარეტის მოწევა.

იწვევს თუ არა ვეიფინგი გვერდით მოვლენებს?

როგორ მოქმედებს ელექტროსიგარეტი ჯანმრთელობაზე?

ამ საკითხზე კვლევა ჯერ კიდევ გრძელდება, შესაბამისად, ელექტროსიგარეტის გრძელვადიანი ზეგავლენა ჯერჯერობით ცნობილი არ არის.

ელექტროსიგარეტი (e-cigarette ან vape) ჩვეულებრივ შეიცავს ნიკოტინს - ნივთიერებას, რომელიც იწვევს დამოკიდებულებას, თუმცა ის არ შეიცავს თამბაქოს, რომელიც არის სიგარეტის ყველაზე მავნე კომპონენტი და კიბოს მთავარი გამომწვევი.

არსებული კვლევების უმრავლესობა აჩვენებს, რომ ვეიფინგი ბევრად ნაკლებად მავნეა, ვიდრე მოწევა, რადგან:

ელექტროსიგარეტები არ შეიცავენ კიბოს გამომწვევ თამბაქოს,

და მათში არ არის ის მრავალი ტოქსიკური ქიმიკატი, რომელიც ჩვეულებრივ სიგარეტებში გვხვდება.

ზოგიერთ ელექტროსიგარეტში აღმოჩენილია პოტენციურად მავნე ქიმიკატები, მაგრამ მათი რაოდენობა ძალიან მცირეა, ვიდრე სიგარეტებში.

ელექტროსიგარეტი სრულიად უვნებელი არ არის. მისმა გამოყენებამ შეიძლება გამოიწვიოს გვერდითი მოვლენები, როგორიცაა:

ყელისა და პირის ღრუს გაღიზიანება

თავის ტკივილი

ხველა

გულისრევა

ეს სიმპტომები, როგორც წესი, დროთა განმავლობაში ქრება.

არის თუ არა პასიური ვეიფინგი მავნე?

ამ დროისთვის არ არსებობს მტკიცებულება, რომ ელექტროსიგარეტის ორთქლს შეუძლია ზიანი მიაყენოს გარშემომყოფებს.

ამ ეტაპზე არ არსებობს მტკიცებულება, რომ ვეიფინგი იწვევს კიბოს.

გახსოვდეთ, რომ ელექტროსიგარეტი შეიძლება გამოიყენოთ მხოლოდ როგორც დამხმარე ინსტრუმენტი მოწევის შესაწყვეტად.

დაბოლოს, საუკეთესო გადაწყვეტილება ონკოპაციენტის მხრიდან ნებისმიერი სახის სიგარეტზე უარის თქმა და ჯანსაღი ცხოვრების წესის არჩევაა

გააზიარეთ პოსტი, რათა მეტმა ადამიანმა გაიგოს ჩვენ შესახებ.

ორსულობა მკერდის კიბოს შემდეგ ◦ 5-წლიანი კვლევის საიმედო შედეგები

ძუძუს კიბოს დიაგნოზი ნებისმიერი ასაკის ადამიანის ცხოვრებას ცვლის, თუმცა ახალგაზრდა ქალებისთვის დამატებით გამოწვევებთან შეიძლება ასოცირდებდეს, როგორიცაა ადრეულ/ხელოვნური მენოპაუზა, ნაყოფიერებასთან დაკავშირებულ კითხვები და შფოთვა.

აქვე გასათვალისწინებელია, რომ:

ძუძუს კიბოს მქონე ქალი პაციენტების დაახლოებით 20% დიაგნოზს იღებს რეპროდუქციულ ასაკში.

ძუძუს კიბოს მქონე ახალგაზრდა ქალების უმრავლესობას აქვს ჰორმონდადებითი (HR+) სიმსივნე.

გაზრდის თუ არა ორსულობა ჰორმონდადებითი ძუძუს კიბოს რეციდივის რისკს და რამდენად? რამდენად უსაფრთხოა ორსულობა?

POSITIVE დღემდე ყველაზე მასშტაბური და მიმდინარე კვლევაა, რომელიც სწავლობს რამდენად უსაფრთხოა ენდოკრინული თერაპიის დროებითი შეწყვეტა დაორსულების მიზნით ჰორმონდადებითი ძუძუს კიბოს მქონე ახალგაზრდა ქალებში.

კვლევაში მონაწილეობს 42 წლამდე ასაკის 518 ქალი 20 ქვეყნიდან, რომლებსაც ჰქონდათ I, II ან III სტადიის ძუძუს ჰორმონდადებითი კიბო 2014 წლიდან 2019 წლამდე.

ენდოკრინული თერაპიის მინიმუმ 18 და მაქსიმუმ 30 თვის მიღების შემდეგ, კვლევაში ჩართულ პაციენტებს სამი თვით შეუჩერდათ მკურნალობა, სანამ დაორსულებას შეეცდებოდნენ.

ენდოკრინული მკურნალობის შეჩერება მაქსიმუმ დასაშვებია ორი წლის განმავლობაში, რათა ქალებს ჰქონოდათ დაორსულების, მშობიარობის და ძუძუთი კვების შესაძლებლობა. მაქსიმუმ ორწლიანი წყვეტის შემდეგ ენდოკრინული თერაპია კვლავ გრძელდება.

POSITIVE კვლევის 5-წლიანი დაკვირვების შედეგების მიხედვით:

ადრეული სტადიის, ჰორმონდადებითი ძუძუს კიბოს მქონე ახალგაზრდა ქალებში ორსულობის მიზნით ადიუვანტური ენდოკრინული თერაპიის დროებითმა (მაქსიმუმ 2 წლიანმა) შეწყვეტამ 5-წლიან პერიოდში არ აჩვენა ძუძუს კიბოს რეციდივის რისკის ზრდა.

კვლევაში მონაწილე ქალების 74% ამ პერიოდის განმავლობაში ჰქონდათ სულ მცირე ერთი ორსულობა. 63% კი შეძლო მინიმუმ ერთი შვილის გაჩენა.

ჰორმონდადებითი ძუძუს კიბოს რეციდივები შესაძლოა 20 წლის ვადაშიც კი განვითარდეს. შესაბამისად, გრძელვადიანი მონიტორინგი აუცილებელია, რათა შეფასდეს შედეგები უფრო ხანგრძლივი დროის განმავლობაში და უზრუნველყოფილი იყოს დამატებითი რეკომენდაციები კლინიკური პრაქტიკისთვის.

გთხოვთმ გააზიაროთ პოსტი, რათა მეტმა ადამიანმა შეიტყოს ჩვენ შესახებ

მკერდის კიბოს რეციდივის სიმპტომები • რას უნდა მივაქციოთ ყურადღება?

მკერდის კიბო უმეტეს შემთხვევაში მკურნალობის შემდეგ არ ბრუნდება, მაგრამ ყველა პაციენტს აქვს რეციდივის შიში.

მიაქციეთ ყურადღება ნებისმიერ ცვლილებას გულმკერდის არეში.

ამისთვის რეკომენდებულია თვითშემოწმება (თვეში ერთხელ და არა ზედმეტად ხშირად)

რა სიმპტომებს უნდა მივაქციოთ ყურადღება?

მკერდის, იღლიის ან ხელის შეშუპება

მკერდის ფორმის ან ზომის შეცვლა

კანის ტექსტურის ცვლილება - დაჭმუჭნა ან ჩაღრმავება

ძუძუსთავის ფორმის ან მდებარეობის ცვლილება - ჩატრიალება ან შეწევა

გამონადენი ძუძუსთავიდან

სიწითლე ან გამონაყარი კანზე - ძუძუსთავის გარშემო ან ოპერაციის ნაწიბურის მიდამოში

შესამჩნევი სიმაგრე - ნაწიბურზე ან მისგან მოშორებით

შეატყობინეთ ექიმს ნებისმიერი სიმპტომის შესახებ, რომელიც:

ახალია ან უჩვეულოა თქვენთვის

არ აქვს მიზეზი

არ ქრება (ორი კვირის განმავლობაში)

გააზიარეთ პოსტი, რათა მეტმა ადამიანმა გაიგოს ჩვენ შესახებ

რა მსურდა მცოდნოდა, როდესაც ახალგაზრდას მკერდის კიბო დამიდგინდა?(ნაწილი3)

"რა მსურდა მცოდნოდა, როდესაც ახალგაზრდას მკერდის კიბო დამიდგინდა?

(ამონარიდები ინტერვიუებიდან - ნაწილი 3)

„მინდოდა მცოდნოდა, რომ დეპრესია კიბოს მკურნალობის დროს ჩვეულებრივი მოვლენაა.

მკურნალობის აქტიური ფაზის ბოლოს ანტიდეპრესანტის მიღება დავიწყე. ვისურვებდი, ეს ნაბიჯი უფრო ადრე გადამედგა. "

— ტონი

“ვისურვებდი, ვინმეს ეთქვა, რომ არ არის აუცილებელი ყოველთვის ძლიერი იყო.“

— თამარა

“მნიშვნელოვანია გქონდეთ ურთიერთობა ისეთ ადამიანებთან, რომლებსაც ეს გზა უკვე გავლილი აქვთ.

იმ ადამიანების მოსმენა, რომლებიც ზუსტად იმავეს განიცდიდნენ, რასაც მე, ძალიან ბევრს ნიშნავდა ჩემთვის”

— ტარინი

„მოითხოვეთ დახმარება და მხარდაჭერა. ნუ შეეცდებით ყველაფერთან მარტო გამკლავებას, რადგან ეს წარმოუდგენელია!

სთხოვეთ მეგობრებს დახმარება, ესაუბრეთ ექიმს თქვენს პრობლემებზე”

— ამანდა

„მინდოდა, მცოდნოდა, რომ… მკურნალობის, გვერდითი ეფექტებისა და სხეულის ცვლილებების მიუხედავად, კვლავ შესაძლებელია ბედნიერებისა და სიხარულის განცდა“

— კაროლინი

„მინდოდა ვინმეს ეთქვა, რომ აუცილებელი არ არის ყოველთვის ძლიერი იყო. გლოვა, შიში და გაღიზიანება ნორმალურია.

მეგონა, რომ ყოველთვის პოზიტიური უნდა ვყოფილიყავი, მაგრამ სინამდვილეში, მჭირდებოდა სივრცე, სადაც ყველა ემოციას (მათ შორის ბრაზს) თამამად გამოვხატავდი.”

— თამარა

„კიბოს დიაგნოზი მხოლოდ მკურნალობას არ ეხება.

მკურნალობის დასრულების შემდეგ იწყება რეალური მენტალური ბრძოლა.

ის, რომ აქტიური მკურნალობა დასრულებულია, არ ნიშნავს, რომ ეს გზა დასრულდა და თქვენ უცებ დაუბრუნდებით ძველ ცხოვრებას.

დრო მიეცით საკუთარ თავს და გამოხატეთ ყველა ემოცია.“

— ჰანა

„არ მოვემზადე იმ რთული პერიოდისთვის, რაც ქიმიოთერაპიისა და მასტექტომიის დასრულების შემდეგ მოვიდა.

კიბო აღარ მქონდა!

სწორედ ამ დროს შევძელი დამენახა ყველაფერი, რაც გავიარე, რა დავკარგე და რა დავამარცხე.“

— ნიკოლი

"დიაგნოზმა შეიძლება შენი ცხოვრება სამუდამოდ შეცვალა, მაგრამ ეს არ ნიშნავს რომ ახალი ცხოვრება მშვენიერი არ შეიძლება იყოს.”

— კრისი

“დიაგნოზმა შემცვალა. უფრო გამბედავი გამხადა.

დავძლიე ფრენის შიში, გავიჩინე ახალი მეგობრები და ბევრი ახალი ჰობი. უკეთესი ადამიანი გავხდი.

განსხვავებული ვარ, მაგრამ მაინც მე ვარ.”

— ქეითი

გაგვიზიარეთ გამოცდილება

რა იყო თქვენთვის მკურნალობის დროს ემოციური თვალსაზრისით ყველაზე რთული?

გააზიარეთ პოსტი, რათა მეტ ონკოპაციენტს მივაწვდინოთ ხმა

რა მსურდა მცოდნოდა, როდესაც ახალგაზრდას მკერდის კიბო დამიდგინდა?(ნაწილი2)

"რა მსურდა მცოდნოდა, როდესაც ახალგაზრდას მკერდის კიბო დამიდგინდა? " (ამონარიდები ინტერვიუებიდან - ნაწილი 2)

„რაც არ უნდა გასაკვირი იყოს, ყველაფერი გაცილებით მარტივდება, როცა დიაგნოზი დასტურდება და მკურნალობა იწყება. ძალიან მეშინოდა ქიმიოთერაპიის, ოპერაციის, რადიაციის, მაგრამ, ამ გადმოსახედიდან, ყველაზე რთული დიაგნოზის დასმის ეტაპი იყო.

სირთულეების ფონზე უნდა გააგრძელო ცხოვრება და მიიღო ის ისეთი, როგორიც არის”

— ტერრი

„მინდოდა, მცოდნოდა, რომ ქიმიოთერაპიის ინტერვალებში ბევრი დღე მექნებოდა, როცა თავს შედარებით კარგად ვგრძნობდი და შევძლებდი ჩემს ოჯახის წევრებთან ერთად სასიამოვნო დროის გატარებას”

— კლერი

„მინდოდა, უფრო მეტი მცოდნოდა მკურნალობის გახანგრძლივებულ გვერდით ეფექტებზე.

მეგონა, ქიმიოთერაპიისა და ოპერაციების დასრულების შემდეგ, ორგანიზმი სწრაფად აღიდგენდა ძალებს. მაგრამ არავინ მითხრა, რომ ეს პროცესი არ არის სწორხაზოვანი.

დაღლილობა, “ქიმიო ტვინი”, სხეული აღარ გრძნობს თავს ისე, როგორც ადრე.“

— თამარა

„ახალგაზრდა ასაკში, ჰორმონდადებითი კიბოთი დაავადება ნიშნავს, რომ ტამოქსიფენი ან არომატაზის ინჰიბიტორი უნდა მიიღო ხანგრძლივად, ვიდრე ბუნებრივი მენოპაუზა არ დაიწყება.

ჰორმონოთერაპიის დროს განცდა გაქვს, თითქოს შენი სხეული გაცილებით ასაკოვანია.

ძვლებისა და სახსრების ტკივილი, შეშუპება, დაღლილობა — მუდმივად ცდილობ ამ ყველაფერთან გამკლავებას “

— ქეითი

„ჩემი შვილი 18 თვის იყო, როცა დიაგნოზი დამიდგინეს.

ჩემი ჯანმრთელობა, მკურნალობა და გვერდითი ეფექტების მართვა პატარასთან ერთად ძალიან გამიჭირდა.

ბავშვები არ წყვეტენ განვითარებას, შენს სხეულს კი ამ რთულ პერიოდში დასვენება სჭირდება.

დედობასა და მკურანლობას შორის ბალანსის პოვნა ერთ-ერთი ყველაზე რთული ასპექტი იყო."

— ჯორჯენი

„ძნელია მკურნალობის პროცესში იყო ისეთი მშობელი, როგორიც მანამდე იყავი.

მაგრამ ბავშვებს აქვთ უნარი, დაინახონ, რომ ამ რთულ პერიოდში შენი პრიორიტეტი საკუთარ თავზე ზრუნვაა.“

— ნიკოლი

„ახალგაზრდა ასაკში მენოპაუზა და მისი გვერდითი ეფექტების მართვა ბევრ სირთულეს უკავშირდება.

მეგონა, სხივური თერაპიის დასრულების შემდეგ ყველაფერი დასრულდა, თურმე ჯანმრთელობაზე ზრუნვა ბევრად მეტს მოიცავს.“

— ქეითი

„ქიმიოთერაპიისა და ჰორმონული თერაპიის გამო ჩემი სექსუალური ცხოვრება ძალიან შეიცვალა. დაქვეითებული ლიბიდო, ვაგინალური სიმშრალე და საკუთარი სხეულის მიუღებლობა ახალი გამოწვევა აღმოჩნდა."

— ნიკოლი

„მინდოდა, ვინმეს ეთქვა, როგორ მეზრუნა საკუთარ მენტალურ ჯანმრთელობაზე მკურანლობის პროცესში.

ქიმიოთერაპიის, ოპერაციის და სხივური თერაპიის გვერდითი ეფექტებისთვის მზად ვიყავი, მაგრამ არავინ მომამზადა იმ ემოციური ჯოჯოხეთისთვის, რომელიც წინ მელოდა.“

— კორტნი

“ონკოლოგთან ყველა ვიზიტზე ექიმი მეკითხებოდა: "დეპრესია ხომ არ გაქვს"?

ყოველთვის ვამბობდი, რომ არა. ახლა, როდესაც ჩემ მიერ განვლილ გზას ვუყურებ, ვხვდები, რომ კი.

სჯობდა მაშინვე მეღიარებინა საკუთარი მდგომარეობა და მეზრუნა მენტალურ ჯანმრთელობაზე, რადგან ეს ბევრ რამეს გაამარტივებდა. ახლა გავდივარ ფსიქოთერაპიის კურსს, რაც ჩემს შფოთვასა და დეპრესიას ამცირებს.“

— ტარინი

გაგვიზიარეთ გამოცდილება

თქვენ რის ცოდნას ისურვებდით თავიდანვე, როდესაც დიაგნოზი გაიგეთ?

რა მსურდა მცოდნოდა, როდესაც ახალგაზრდას მკერდის კიბო დამიდგინდა?(ნაწილი1)

"რა მსურდა მცოდნოდა, როცა ახალგაზრდას მკერდის კიბო დამიდგინდა?"

ხშირად მიიჩნევენ, რომ მკერდის კიბო უფრო ასაკოვანი ქალების დაავადებაა, თუმცა სულ უფრო მეტ ახალგაზრდას უდგინდება ეს დიაგნოზი.

მკერდის კიბოს დიაგნოზი ახალგაზრდა ასაკში სამყაროს თავდაყირა აყენებს — თითქოს ყველაფერი, რასაც გეგმავდი, თავზე გენგრევა: სწავლა, კარიერა, ოჯახი, დედობა, ან უბრალოდ ის გზა, როგორადაც შენს მომავალს ხედავდი.

Breastcancer.org-მა მსოფლიოს სხვადასხვა კუთხეში მცხოვრებ ქალებს,

რომლებსაც მკერდის კიბო 18–45 წლის ასაკში დაუდგინდათ, ჰკითხა:

რის ცოდნას ისურვებდნენ დიაგნოზის დასმის დროს?

ჩვენი გვერდი გთავაზობთ ამონარიდებს ამ ინტერვიუებიდან

(3 ნაწილად) და გთხოვთ, რომ თქვენც გაგვიზიაროთ თქვენი გამოცდილება კომენტარებში.

"ვისურვებდი,მცოდნოდა, რომ 38 წელი ამ დაავადებისთვის

“ძალიან ახალგაზრდა” სულაც არ არის და რომ მკერდის კიბო ნებისმიერ ადამიანს შეიძლება დაემართოს, მიუხედავად გენეტიკური განწყობისა და ოჯახური ისტორიისა.

მეგონა, რომ ამ ასაკში მკერდის კიბოსგან დაზღვეული ვიყავი და სამწუხაროდ დრო დავკარგე. ექიმისთვის მალევე რომ მიმემართა, უფრო მსუბუქი მკურნალობის კურსის გავლა დამჭირდებოდა"

— ქეითი

"დიაგნოზი დამისვეს 40 წლის ასაკში,

როცა ცხოვრებაში ფიზიკურად ყველაზე კარგ ფორმაში ვიყავი.

ამან დამარწმუნა, რომ მნიშვნელობა არ აქვს ასაკს და ფიზიკურ სიძლიერეს. ეს დიაგნოზი ნებისმიერ ადამიანს შეიძლება დაუდგინდეს!"

— კრისტენი

„მკერდის კიბოს დიაგნოზის შემდეგ ყველაფერი იმდენად რთულია,

რომ გადაწყვეტილების მიღება შესაძლოა დამაბნეველი იყოს.

ვისურვებდი, თავიდანვე მცოდნოდა დეტალურად,

რა განსხვავებაა ლამპექტომიასა და მასტექტომიას შორის

და როგორ შეიძლება ეს არჩევანი მომავალში რეციდივის მკურნალობაზე აისახოს.“

— დანიელი

„რაც უფრო მეტ კითხვას დაუსვამ შენს სამედიცინო გუნდს, მით უკეთესად დაგეხმარებიან ისინი.

შენ ვერ ირჩევ იმას, შეგხვდება თუ არა ეს დაავადება,

მაგრამ შეგიძლია თავად განსაზღვრო, რას გააკეთებ ახლა.

ნუ შეჩერდები მანამ, სანამ არ მიიღებ ყველა კითხვაზე პასუხს.

არასოდეს დანებდე!“

— როზმერი

„დიაგნოზმა ოჯახის შექმნის და შვილის ყოლის გადაწყვეტილებაზე გავლენა იქონია.

მიუხედავად იმისა, რომ კვერცხუჯრედების გაყინვა მოვასწარი,

ქიმიოთერაპიისა და რადიაციის შემდეგ ჩატარებულმა მკურნალობამ

დედობა მინიმუმ სამი წლით გადამიწია.

ემოციურად ძალიან რთულია, როდესაც შენი გეგმების შეცვლა გიწევს, ზოგიერთი რამ კი უბრალოდ განუხორციელებელი რჩება."

— ჯორჯენი

„ყოველთვის მინდოდა ჩემს ერთადერთ შვილს და-ძმა ჰყოლოდა,

მაგრამ ახლა ეს შეუძლებელია.

ყოველთვის მექნება დანაშაულის შეგრძნება, რომ ის ამ გამოცდილების გარეშე გაიზრდება."

— სრიჯა

"ვისურვებდი, რომ მეტი დრო დამეთმო მკერდის რეკონსტრუქციის ყველა ვარიანტის შესასწავლად.

მე გავიკეთე ორმხრივი მასტექტომია და სამწუხაროდ ვერ შევინარჩუნე დვრილები.

რამდენიმე წლის წინ გავიკეთე 3D დვრილის ტატუ, რაც ძალიან დამეხმარა — ჩემი მკერდი მაქსიმალურად მიუახლოვდა ბუნებრივ იერსახეს.“

— პამი

„რეკონსტრუირებული მკერდი არასოდეს იქნება ისეთი, როგორიც ბუნებრივი იყო.

თუ კიბო მხოლოდ ერთ მხარეს გაქვს, იფიქრე ყველა ვარიანტზე

და განსაზღვრე, რა არის შენთვის მნიშვნელოვანი — შენი იდენტობა, სექსუალურობა, ჯანმრთელობა თუ თვითგამოხატვა.“

— ჯენიფერი

გაგვიზიარეთ გამოცდილებარა იყო ის, რაც გსურდათ, რომ დიაგნოზის გაგებისთანავე გცოდნოდათ?